قال على رأى المثل

شوية أمثال مصرية إنما حكم

• على قد لحافك مد رجليك
• دبر غداك تلقى عشاك
• قبل ما تفصل قيس
• أبو البنات مرزوق
• أدعى على ولدي وأكره اللى يقول آمين
• اللي ما تربيه الأهالي تربيه الأيام والليالي
• أبوك البصل وأمك الثوم منين لك الريحة الطيبة يا مشئوم
• اتعب جسمك ولا تتعب قلبك
• اللي ما يستحي ما يشتهي
• نار جوزي ولا جنة أبويا
• مكسح يجر مكسح ويقوله يلا نتفسح
• افتكر لك إيه يا بصلة وكل عضة بدمعة
• امشي في جنازة ولا تمشي في جوازة
• اللي يكذب نهار الواقفة يسود وشه نهار العيد
• يا مآمنة للرجال يا مآمنة للمية في الغربال
• الشاطره تغزل برجل حمار
• الحلو حلو لو يقوم من النوم ، والوحش وحش إنشاله يغسل وشه كله يوم
• اللي متحبش تشوف وشه انهرده بكره تتمنى تشوف قفاه
• لا تصاحب الأقرع ولا تأخذ منه نصيحة ، لو ربنا يحبه كان خلاها له صحيحه
• خنفسه شافت ولادها على الحيط ، قالت : ده لولي ملضوم في خيط
• الشايب لما يدلع زي الباب المخلع
• من قدامك مرايه وفى القفا سلاية
• من بره هالله هالله ، ومن جوا يعلم الله
• أقلب القدرة على فهمها ، تطلع البت لأمها
• قليل البخت يلاقى العظم في الكرشة
• قلبي على ولدى انفطر ، وقلب ولدى عليا حجر
• القرعة تتباهى بشعر بنت أختها
• يا مصبر الوحش على الجحش
• اللهم طولك يا روح على هذا اللوح
• اللي تقول عليه موسى يطلع فرعون
• قليل الأصل لا تعاتبه ولا تلوموا ، ده زي البقعة اللي لا تطلع برابسو ولا بأومو .
• القفه ام ودنين يشلوها اثنين
• باب النجار مخلع
• زي الحربايه بميت لون
• تيتي تيتي زي مارحتي زي ماجيتي
• زى القرع يمد لبره
• أول القصيده كفر
• قد النمله وتعمل عمله
• أدي العيش لخبازة ولو يأكل ثلاث أرباعه
• حمارتك العرجه تغنيك عن سؤال اللئيم
• بصلة المحب خروف
• ضرب الحبيب زي أكل الزبيب
• اللي اتلسع من الشوربة بينفخ في الزبادي
• نقول ثور ، يقول احلبوه
• مرايه الحب عاميه تخلى الكوسه باميه
• قصر و لم المكسر
• النملة طلع لها سنان
• قالو لحمتك مشغته ليه ، قالهم : اصل الجزار معرفه
• الإنسان ميملاش عينه غير التراب
• طباخ السم بيدوقه

• 
  
  كان نفسى اتولد فى مصر أيام زمان ,الحياة كانت هادية وروقان عالآخر

وكمان فرص الشغل والسكن كانت أحسن من دلوقتى .معظم المصريين كانوا فقراء واكلينها بدقة بس السعادة على وشوشهم مش بتفارقها , رايقين ومروقين دماغهم وبيضحكوا من قلبهم.أحلى حاجة إنهم كانوا بيعرفوا يعبروا عن نفسهم ورأيهم بطرق ظريفة وذكية,وخدوا برائة اختراع فى ضرب الأمثال الشعبية ,اللى يا خسارة بدأت تتنسى دلوقتى مع إنها من تراث المصريين.

• 
  
  أمثال شعبية لكن بعد التطوير
  
  

اللى بيته من إزاز ميغيرش هدومه فى الصالون

فاقد الشىء يدور عليه

اقلب القدره على فومها الفول يقع منها

تأتى الرياح محمله بالأتربة

ياخبرالنهارده بفلوس بكره ينزل عليه أوكازيون

اللى معاه قرش محيره يجيب حمام ويحمره

قال يامحشحشين يكفيكوا شر الكمين

اللى ياكل لوحده يشبع

اقطع عرق و حته بتلو

اطبخى ياجاريه الأنبوبه فاضيه يا سيدى

لو حبيبك عسل ما تحطلوش طحينة

اللى يتلسع من الشوربه يتصل بالمطافى

وبكره ترجع ريما من عند خلتها فى مارينا

ياداخل بين البصله وقشرتها حط قطرة علشان هادمع من ريحتها

اصوم اصوم وافطر على المدفع

القرش الأبيض بيعوم فى البحر الأحمر

ضربوا الأعور على عينه قالهم كسرتوا النضاره

اللى ميشفش من الغربال يكشف نظر

من خرج من داره مينساش يأخد المفتاح معاه

الباب اللى يجيجلك منه الريح شيله وركب قبنورى

المضطر يركب التاكسى

رب صدفة خير من ألف ليلة و ليلة

اللى يخاف من العفريت يعمل عبيط

المركب اللى فيها رايسين يلعبوا طاولة

اللى خدتوا الأرعه تخدو ام الخلول

أكل العيش يحب الطعميه

قاوا للحرامى أحلف قالهم وحياة قلبى وأفراحوا

القرش الأبيض بيعوم في البحر الأحمر

ضربوا الأعور على عينه قالهم كسرتوا النضارة

اللي ميشفش من الغربال يكشف نظر

المال السايب يعلم الطلبة

وأكتر مثل عجبنى أوى
أم بربور ما بتبور

غريب فى وطنه

فلسطين ,العراق ,أفغانستان, السودان,سوريا, ولبنان بلاد أصبح فيها القتل والإبادة الجماعية أمور عادية إتعودنا نشوفها ونسمعها كل يوم فى نشرات الأخبار.
و التوسع الإستيطانى مستمر أكتر من 60 سنة , ولحد أمتى مش عارف؟؟

يرد المواطن العربى ويقول:
طيب وأنا بإيدى إيه أعمله؟ دى عالم خونة وبيقتلوا فى بعض وباعوا أرضهم للصهاينة هروح أحارب يعنى بدلهم يا عم أنا مالى !

و كل همه فى الحياه هو الأكل والشرب وجمع الفلوس و متناسى إن الدور هيجى عليه فى يوم من الأيام.

إسرائيل وأمريكا كل يوم ترتكب مذبحة جديدة فى حق الفلسطينين والعراقيين وتقتل منهم نساء وأطفال قدام العالم كله بحجة الحرب على الأرهاب .

بيقولوا إن هدفهم تحريرالشعوب و إنهم عايزين يطهروا العالم من الفساد ويقضوا على الإرهاب .

الكل عارف إن مهما إختلفت المسميات و الشعارات هيفضل حلم اليهود ثابت وهو إقامة إسرائيل الكبرى من النيل الى الفرات, وده اللى لازم نفضل فاكرينه كويس.

الإرهاب هو المقاومة بزعمهم واللى هى أساسا حق مشروع لأى دولة فى الدفاع عن أراضيها .
وقت الحرب يدمروا شعوب كاملة بإستخدام جميع أنواع الأسلحة الفتاكة ,

علشان يحرروا شعب من الفساد يموتوا نصه , وبعد كده يرسلوا إعتذارات لأهالى الأسر اللى أبيدت بالكامل بحجة إن اللى حصل غير مقصود.
و طبعا المساجد والمستشفيات والمدارس اللى ضربوها كان المقاومين الأرهابيين بيستخدموها لتخزين صواريخهم النووية .

للأسف القانون الدولى ده معمول علشان يطبق على العرب والمسلمين فقط , ولأسرائيل الحق فى إمتلاك كافة أسلحة الدمار الشامل وقتل وتشريد الآلاف من الأطفال وتمزيق آبائهم بدون أى ذنب أمام أعينهم.



جرب وافتح موقع جوجل وأكتب فى بحث الصور أطفال يهود هتلاقى نتيجة البحث مختلفة تماما عن بحثك عن أى أطفال من جنسيات تانية .

الأطفال فى إسرائيل من صغرهم بيتربوا على إن باقى الأجناس خلقت لخدمتهم وإنهم أبناء الله.

تعاليم دينية زى دى تتزرع جوه طفل صغيرمتلومهوش على اللى ممكن يعمله لما يكبر .

مفيش حد بيتولد إرهابى , والمعنى الحقيقى للإرهاب موجود فى طفل أبوه وأمه هما اللى علموه إزاى يقتل مش فى طفل شاف أبوه وأمه بيتقتلوا قدامه وعايز يدافع عن أرضه
وشرفه.
شارون وهو عنده 18 سنة فى أول أجازة ليه بعد إلتحاقه بالجيش الإسرائيلى قتل سيدة فلسطينية عمرها 81 سنة وفضى مشط رصاص كامل فى جسدها من غير أى ذنب إرتكبته , بس لأنه إتربى على أن العرب مخلوقين لخدمته وميستحقوش أنهم يعيشوا .

أنا لو حبيت ألوم فلازم ألوم الإعلام اللى بيضلل الشعوب وبيخبى عنهم الحقيقة .

أما بقى بالنسبة للقادة والزعماء بتوعنا فدول ناس مش فاضيبن خالص مشغولين الله يكون فى عونهم.
فى وقت الشدائد تلاقى قراراتهم وتصريحاتهم كلها قوة وحزم ,
طبعا شوفنا أد إيه حزنهم الشديد بعد أحداث غزة الأخيرة والقمة العربية اللى شكلوها فى وقت قياسى لوضع حد للمهزلة دى(ملحوظة :عدد القتلى والجرحى الفلسطينين كان تجاوز 6000 ) صحيح كانت متأخرة شوية بس إحنا لازم نعذرهم أكيد المواصلات كانت زحمة يومها .

وزى مقال الشاعر:
أسد عليا وفى * الحروب نعامة .
طبعا مسرحية كوميدية بيعيدوها كل أما إسرائيل ترتكب مذبحة جديدة وحفظناها خلاص .

أما الشعب العربى فللأسف فاق متأخر , كان أشبه بقطيع الاغنام اللى ماشى ورا حكوماته ومش عارف هوا رايح فين,
تلاقيه يوم فى مظاهرة علشان الكورة ويوم فى مظاهرة علشان فلسطين,إهتمامتنا بالأفلام والأغانى نسيتنا إن أعدائنا عايزين يسيطروا على أفكارنا , من جوانا فاضين وحياتنا مجرد تقليد أعمى.

المصريين رجاله ومماتوش فى 73 ولا حاجة, وأنا شايف إن الأيام الجاية هتكون مختلفة وأحداث غزة الأخيرة فوقت ناس كتير وصحت عندنا شعور مات من سنين وهو الهوية العربية ,وبينت قدام شعوب العالم كله مين هو الإرهابى الحقيقى.
حل واحد بس لكل مشاكلنا نرجع لربنا ونعتز بأصلنا و نتقى الله شوية وساعتها النظام الحاكم هيتغير مع الوقت لما إحنا نتغير.
صحيح صلاح الدين اللى هيوحد الصفوف لسه مجاش وقته , بس الأمل لسه موجود .

أظن الفكرة وصلت