الفقر هو حالة إقتصادية ناتجة فى نقص الموارد الاساسية للحياة من غذاء وملبس وتعليم وصحة وأموال.فى مصر أكتر من 25% بيعيشوا تحت خط الفقر والطبقة الوسطى بدأت تتلاشى بسبب إرتفاع الأسعار و ثبات المرتبات و وأصبح المصريين إما فقراء وغلابة أو أغنياء مسيطرين على البلد.
الحكومة غلبانه ومغلوب على أمرها والشعب هو المسؤل مسؤلية كاملة عن الوضع ده , ودايما الحكومة تقول :إحنا بذلنا اقصى ما فى وسعنا ومفيش فى خزانة الدولة يكفى طلبات الشعب الكتيرة
, و بتنصحنا دايما بالتغير وبتردد دايما : ( إن الله لا يغير ما بقوم حتى يغيروا ما بأنفسهم )
شوف التقوى!!
طب يا حكومة يا غلبانة اتغيرى انتى الاول شوفى ليه محدش بقى يشتغل فى مجاله , وليه الشباب مبيعرفش يتجوز غير لما يسافر برة , وليه مفيش إقبال على البحث العلمى .
أولا محدش بيشتغل فى مجاله لأن للأسف التعليم زى الزفت فى مصر والشباب بيتخرجوا مش عارفين حاجه فى تخصصاتهم وبيعتمدوا على خبرتهم وقدراتهم فى مجالات تانيه غير مجالهم ,كمان الشاب المصرى نوعية نادرة, ذكى, وبيفوت فى أى حاجه ومش من النوع العواطلى .
و ليه الشباب مبيعرفوش يتجوزوا غير لما يسافروا برا فالإجابة بسيطة خالص الشاب من دول لو ربنا كرمه واشتغل شغل حكومى هياخد400جنية فى الشهر ده غير العلاوات أم 30 جنيه يبقى قدامه اكتر من 20سنة على ميكون نفسه ده لو فضل عايش ومنتحرش,علشان كده لازم يسافر ويتبهدل ويدوق المر برا بلده.أما بقى ليه مفيش إقبال على البحث العلمى و ده لان خيبتنا تقيله أوى
تخيل إن قيمة الانفاق على البحث العلمى 0.2 % من الموازنة العامة للدولة فى حين إن إسرائيل بتخصص خوالى 2.5%من موازنتها العامة على البحث العلمى .
علشان كده البعثات العلمية مش بيرجع منها إلا 50% فقط لانهم بيلاقوا اللى بيقدرهم ويوفرلهم الموارد والجو المناسب.
إحصائيات الجهاز المركزى للتعبئة العامة و الإحصاء بتقول إن إجمالى الكفاءات و العقول المتميزة المصرية يوجد منها 318 ألفاً فى الولايات المتحدة وإن مصر تقدم 60 % من العلماء العرب و المهندسين إلى الولايات المتحدة الأمريكية لوتم إتاحة الفرصة ليهم فى
مصر مؤكد هنسود العالم .
مصر مؤكد هنسود العالم .الحكومة بتاعتنا مطبقين المثل اللى بيقول( نام وارتاح وكل عسل التمساح)
ومش مهتمين إن بلاد زى أميركا وبريطانيا وكندا ودول غربية غيرهم مستغلين اكتر من 50% من علماء مصر .
شعبنا ده زى الفاكهة بس معصورة فى خلاط اسمه الحكومه المصرية.
هناك 3 تعليقات:
"شعبنا ده زى الفاكهة بس معصورة فى خلاط اسمه الحكومه المصرية."
ايه ياواد العسل ده
الجملة دى المفروض تتدرس يابنى
مبروك البلوج ياصحبى
اى خدمة
اول تعليق عندك اهه
وبالنسبة للموضوع
ردى هى
خلصت
بس كده
سلامووز
الله عليك !
بجد موضوع جامد ومليان أرقام جامدة برضه، لو انت عايز رأيي، أنا شايف إن مصر إتغيرت كتير يمكن عن السنتين اللي فاتوا، مصر بتتحرك ناحية الرأس مالية، وده كويس طبعاً، الناصح بقي إللي يستغل التقدم والإعتدال الإقتصادي اللي مصر فيه دلوقتي
بص يابني، مفيش حاجة اسمها بلاد بره بتقدرنا والكلام ده، إحنا اللي سمحنا للفساد انه يدخل، الحكومة دي هي الخلاط أه، وإحنا اللي بنشغله علينا علشان يطحنا، إحنا اللي مدلدلين راسنا للغرب، الغرب مش شماعة أخطائنا
بس شكراً ع الموضوع
شكرا يارجالة على التعليقات الجامدة وانتو بجد رفعتوا من معنوياتى يارب تكون الفكرة وصلت, بصراحة هو ده حالنا كمصريين معصورين وراضيين ,ويارب يجعل كلامنا خفيف على الحكومة
إرسال تعليق